एक व्यक्तिको मोटरसाइकलको साइलेन्सर पाइप जाँच गर्दा प्रहरी चकित !

काठमाडौँ । एक व्यक्तिको मोटरसाइकलको साइलेन्सर पाइप खोलेर हेर्दा प्रहरी चकित बनेको छ। बा ७९ प १५३८ मोटरसाइकलको साइलेन्सर पाइपभित्र लुकाइराखेको सुनसहित प्रहरीले एक जनालाई पक्राउ गरेको हो। महानगरीय प्रहरी वृत्त बालाजुले १७ किलो सुनसहित सिन्धुपाल्चोक भोटेकोशी गाउँपालिका घर भई हाल बौद्ध बस्ने छुल्टीम तामाङलाई शनिबार साँझ बालाजु चोकबाट पक्राउ गरेको हो। वृत्तले आइतबार पत्रकार सम्मेलन गरी मोटरसाइकलको साइलेन्सर पाइपभित्र लुकाएर ल्याएको अवस्थामा १७ किलो सुन फेला पारेको जानकारी दिएको हो। पत्रकार सम्मेलनमा महानगरीय प्रहरी परिसर काठमाडौँका प्रवक्ता एवम् प्रहरी उपरीक्षक रामदत्त जोशीले साइलेन्सर पाइपभित्र चारपाटे आकारको फल्स बटम बनाई त्यसभित्र तीन पोका बनाएर तामाङले सुन लुकाएर ल्याएको जानकारी दिए। सुन रसुवाको केरुङ, नुवाकोट, धादिङको गल्छी हुँदै काठमाडौँ भित्रिएको अनुसन्धानबाट खुल्न आएको छ। वृत्तले पक्राउ परेका तामाङबाट एक चिनिया नम्बर र अर्को नेपाली नम्बर रहेको मोबाइलसमेत बरामद गरेको छ। बजार मूल्यअनुसार १७ किलो सुनको मूल्य रु आठ करोड आठ लाख ९४ हजार ५०० हुन्छ।